Doa Agama Hindu Kaharingan

Do’a – Do’a Agama Hindu Kaharingan

Setiap umat manusia penganut agama ije kueh bewei, amun handak manyampai kahandak dengan je maha kuasa (Tuhan Yang Maha Esa), Ranying Hatalla Langit, Jatha Balawang Bulau, iete lewat Doa atau balaku asi belum palakuan awat maharing.

Do’a atau balaku asi belum palakuan awat maharing dengan Ranying Hatalla tege macam – macam cara iete :

1.      Amun do’a atau balaku asi belum palakuan awat maharing mahapan bahing pantun sambaing (Balian) te nanjuri ganan tandak balua bulau pantar tatah palus nyaluh jadi ulun mangalunen, hayak nyaluh luhing dandang tingang jadi lasang kumpang gaaru nahapakun tingang akan lasang ganan tandak tulak antang gila namuei.

2.      Amun do’a mahapan tawur te nyaluh behas te jadi ulun mangalunen lentar sihung mangahanyan hayak nyaluh asep garu bulan bakalinda tingan jadi lasang liu bulau daren tanggui akan lasang bual bawin tawur tulak antang manamuei.

3.      Tapi amun do’a atau balaku asi belum palakuan awat maharing akan basarah te nanjuri ganan tandak balua bulau pantara tatah bahanjung rabia sadurin guntum palus bahing bapanting dia usah nyaluh jadi ulun mangalunen tuntang dia usah mahapan lasang. Amun ganan tandak gandang halalian dia usah batambang salumpuk entang amun jatun taluh ije impatei ( manuk atau bawui ) suku mahapan nambawa salumpuk entang gandang halalian buli.

4.      Amun do’a atau balaku assi elum palakuan awat maharing mahapan dahan manuk /bawui, te langsung mamalas atau manyaki ije impahayak dengan auh do’a mamalas (manyaki) tege due macam iete :

\  Nyaki mengkak, iete nyaki bara hunjun akan penda ( bara lambara lawin balau panjang sampai tutuktunjuk pai panyurung nanjung).

\  Nyaki nanteman iete tutuk tunjuk pai panyurung nanjung tende sinde liang lamabaran balau panjang.

Do’a Tamparan Basarah Umum

 Ikei mangaku tuntang percaya :

1.      Ranying Hatalla Katamparan.

2.      Langit Katambuan.

3.      Petak Tapajakan.

4.      Nyalung Kapanduian.

5.      Kalata Padadukan.

Nanjuriku bahingku ganan tandakku balua bulau pntar tatah, nasekei labatan santin karunyangku bahanjung rabia sadurim guntum., eleh bahi – bahing panganak andau nyaumbu parung kurung mangentang bambahingan panyandai bulan manehus siru rutan saripangku palus malan balua parung lalu ringkang bahanjung siru, eleh kilat basangkelang dawen pinang sarayung lewu, liu basampale nyarak bumbung katilambung nyahu palus, malan nyalumbu ambun tilap telu puluh, malangkawet enun lime balas hatalamping are tanjung luwuk nanjung nagkalau dia usah batandak panjang kutuh luwuk enun mapan malingkawet isen batimang ambu, ganan tandakku tintu hakalambat nanturung tumbang kapanjungan manjung, murik – murik kanjungan manjung eleh tapuk tasik ambun bara gantung langit malungkh tasik ambun bara gantung langit tapuk tumbang lawing langit, ganan tandakku murik pamahimping langit tapuk tasik malambung bulau harene laut bapantan hintan, tintu hakalambat ganan tandakku nanturung tumbang batang danum mendeng ngatimbung langit, guhung perimata nyampalak hawun, eleh babalang lenda-lendang balai bulau napatah hintan, balai hintan napatah bulau Sali padadusan Ranying Hatalla langit raja tuntung matan andau Tuhan Tambun Kabanteran bulau jatha balawang bulau kanaruhan bapager hintan, palus kangkarungut ganan tandakku manarinjet Ranying Hatalla langit yyuh tingan tatu, tuh ikei tingan esum jadi tingang hakameleng renteng tambun randan hapampungan lingkat melai bentuk huma hai malabehu benteng siru datuh paharatau ruang manyarah sangku tambaka raja ije hai pahalendang datuh palalingei ngarambang luhing giling pinang hamablat rukun tarahan beras behas bangkusan timpung sindai karut pahangan laut, hapa ikei balaku asi belum palakuan awat maharing, balaku umur panjang, tuah rajaki batu sapaunggut belum liang paneling aseng managta ikei tau belum batuah marajaki panjang umur aseng, dia panjang riwut – riwut raweiku tingang tatu bitim ije raja hai kuasam belum datuh japa jimat maharing handung katawam karangkan lingun ikei pantai danum kalunen, buli ganan tandak masuh pamahimping langit balua tumbang lawing langit tapuk tasik ambun bara gantung langit masuh kapanjungan manjung palus masuh nangkarurung pantang tuyang ambun tilap telu puluh tapuk ambun randah kajang pantai danum kalunen harende enun iwak tingkap luwuk kampungan bunu palus nyelem huma hai malabehu benteng bul ganan tandakku buli nyelem bulau pantar tatah nyuruk rabia sadurim guntum. Sahey … sahey … sahey …

Do’a Penutup Basarah Umum

            Nanjuriku ganan tandakku balua bulau pantar tatah nasekei labatan santin karunyangku bahanjung rabia sadurim guntum palus kangkarungut ganan tandakku narinjet Ranying Hatalla Langit yuh Tingang Tatu Ranying Hatalla Langit tuh ikei tingang esum mahapus pumung basarah ikei, akan bitim mujan akan ikei kayun penyang karuhei tatau sandik paturung sangkalemu raja penyang saritunduk antang enyang panukang burung dahiang pamalis nupi panukang pali batu sapunggut belum liang panaing aseng mangat ikei uras rata belum baumur panjang lumbah langit sapenden tingan hawun miring saluluk bungai, mujan akan  ikei tuah rajaki kapintar kaharati panyalembang untek panarang atei parentass tandak paharus rawei arajang hokum mangat ikei tau belum tatau manyambung kilau asang suhun danum haring raja manggigi tingkh ampah lawing baun andau, palus nagkalahan ikei bara peres baratus gangguranan area, sampar saribu sasabutan bitie kasingen lewu mandereh danum kahirin rundung hapantai tambun, nagklahan ikei bara calaka bahaya lau hutus bunu hantu ngarambang ikei kilau pehun sawang hambalat tingkah ruang jumping bunge. Buli ganan tandakku sambil nambawa bulau hambaruan ikei handiai mikeh atun salumpuk ikei ije laying palus nambawa kuruk kara kuruk kilau nambawan manuk darung tingan nangkiau kuriu bara kuriu tingkah nangkiau riwut burung eleh buli hatampung kilau bua kayun sangalang garing mulang hatundun tingkah langajan tarung, buli nyelem behas mungkus bangkusan timpung sindai hariten halawu benteng habuei kilau kahang duhung barintih tingkah baun pinggan sambung buli ganan tandakku buli bulau pantar tatah mulang nyelem rabia sadurim guntum. Sahey … sahey …sahey …

Do’a Tamparan Basarah Akan Uluh Matei

            Ikei mangaku tuntang Percaya  :

            Ranying Hatalla katamparan

            Langit Katambuan

            Petak Tapajakan

            Nyalung kapanduian

            Kalata Padadukan

Nanjuriku bahing ganan tandakku balua bulau pantar tatah nasekei labatan santin karunyangku bahanjung rabia sadurim guntum bahi – bahing panaganak andau nyalumbu parung hai malabehu benteng, bambahingan panyandai bulan manehus siru datuh paharantau ruang palus malan balua parung eleh kilat basangkelang dawen pinang sarayung lewu liu basampale nyarak bumbung katilambung nyahu nyandar sala lalangae lawin tambung pamalangkan pantar nipas liwus tampajahe ihing sanggaran burung dahiang, palus malan nyalumbu ambun tilap teluh puluh malangkawet enun lime balas hatalamping, are tanjung luwuk nanjung nagkalau dia usah batandak panjang, riwut – riwut ganan tandakku nyelem tumbang kapanjungan manjung, palus murik kanjungan manjung eleh tapuk tasik layang hanteran riwut malungkah tasik laying hanteran riwut palus nyelem tumbang lawing langit riwut – riwut ganan tandakku murik pamahimping langit eleh tapuk tasik malambung bulau harende laut bapantan hintan tintu hakalambat ganan tandakku nyelem tumbang batang danum mendeng ngatimbung langit eleh babalang leda – ledang balai bulau napatah hintan balai hinting napatah bulau Sali padadusan Ranying Hatalla Langit yuh tingang tatu Ranying Hatalla langit tuh kei tingan esum jadi tingan hakampeleng renteng tambun randan hapampungan lingkat manyarah sangku tamabak raja ije hai palalendang datuh pahalingei ngarambang luhing giling pinang hambalat rukun tarahan neras behas bangkusan timpung sindai karut pahangan laut maluhing dandang tingang hapa ikei balaku asi belum palakuan aat maharing, awi bara keluarga laying bau nduan handau endau ikei hagagahae nanturung lewu bukit pasahan raung, rundung kaereng daharing sapenden lunuk nyembangn Raja Entai Nyahu ewen ndue kameluh tantan dandayu mentai panamuei sangiang raja duhung mama tandang hagagahae liau haring kaharingan nanturungn lewu bukit Nalian lanting rundung kereng naliwu rahan nyembang balu indu rangkang penyang. Dia panjang riwut raweiku palus buli ganan tandakku masuh pamahimping angit sembang tumbang lawing langit balua tumbang lawing langit tapuk tasik layang hanteran riwut nyelem tumbang kapanjungan manjung masuh panjungan manjung balua tumbang panjungan manjung palus masuh pantang tuyang ambun tilap telu puluh eleh tapuk ambun randah kajang pantai danum kalunen buli ganan tandakku buli bulau pantar tatah nyelem rabia sadurim guntum. Sahey … sahey … sahey …

Do’a Penutup Basarah Uluh Matei

            Nanjuriku ganan tandakku balua bulau pantar tatah nasekei labatan santin karuyangku bahanjung rabia sadurim guntum, kangkarungut ganan tandakku narinjet Ranying Hatalla Langit yuh tingang tatu etuh ikei tingang esum mahapus pumpung basarah ikei tuh mangat bitim yuh tingang tatu mujan akan ikei kayun penyang karuhei tatau sandik paturung sangkalemu raja batu sapaunggut belum liang panaling aseng terutama akan keluarga huma tuh ije naripi awi kasusah mangat ewen gulung beum tatau manyambung kilau asang suhun danum haring raja manggigi tingka nyahu namparuguh tungkup kilat namparinjet ruang tahjungan tarug liau haring kaharingan lumpat lawing lewu tatau dia rumpang tulang jakat rundung raja isen kamalesu uhat, mujan akan ikei penyang sangkalemu raja penyang panukang burung dahiang pamalis nupi panukang pali, nangkalahan ikei bara peres baratus gangguranan area sampar saribu sasabutan bitie kasingen lewu mandereh danum kahirin rundung hantai tambun bara calaka bahaya tengampung huang akna tarantang nule palus ngarambang tarantang nule bakawan ikei handiai kilau pulau pehun sawang hamabalat tingkah ruang jumping bunge dia panjang riwut raweiku tingang tatu bitim je puna raja hai kuasam belum kanaruhan datuh japa jimat maharing handung katawam karangkan lingun ikei pantai danum kalunen, buli ganan tandakku sambil nambawa salumpuk entang bakawan buli eleh nambawa kuruk bara kuruk kilau nambawa manuk darung tingan kuriu bara kuriu tingkah nagkiau riwut burung buli hatampung kilau bua kayun sangalang garing mulang hatundun tingkah langajan tarung buli nyelem behas mungkus bangkusan timpung sindai karut pahangan laut aka nanteluh halawu upun tundue hariten halawu benteng habuei kilau kahang duhung barintih tingkah baun pinggan sambung. Buli ganan tandakku buli bulau pantar tatah nyelem rabia sadurim guntum. Sahey … sahey … sahey …

Do’a Basarah Akan Uluh Kawin

Ikei mangaku tuntang percaya :

Ranying Hatalla Katamparan

Langit Katambuan

Petak Tapajakan

Nyalung Kapanduian

Kalatta Padadukan

            Nanjuriku bahing ganan tandakku balua bulau pantar tatah nasekei labatan santin karunyangku bahanjung rabia sadurim guntum, elehh malan balua parung lalu ringkang bahanjung siru eleh kilata basangkelang dawen pinang sarayung lewu iu basampale nyarak bumbung katilambung nyahu nyandar sala lalangae lawin tambun palangkan pantar nipas liwus tampajahae ihing sanggaran burung dahiang, palus malan nyalumbu ambun tilap telu puluh malangkawet enun lime tumbang kapanjungan manjung palus murik kapanjungan manjung tapuk tasik ambun bara gantung langit nanjung nangkalau ganan tandakku sembang tumbang lawing langit, panamuei tenjek ganan tandakku murik pamahimping langit eleh tapuk tasik malambung bulau harende laut bapantang hintan tintu hakalambat ganan tandakku nanturung tumbang batang danum mendeng ngatimbung langit guhung parimata nyampalak hawun eleh babalang, endalendang balai bulau napatah hintan balai hintan napatah bulau  Sali padadusan Ranying Hatalla Langit palus kangkarungut ganan tandakku malawu rawei narinjet Ranying Hatala Langit yuh tingang tatu etuh ikei tingan esum jad tingkang hakampeleng renteg melai bentuk huma hai malabehu benteng, tambun randan hapampungan lingkat bantukan siru datuh marantau ruang, tuh ikei manyarah sangku tambak raja ije hai pahalendang ngaramabng luhing giling pinang hambalat rukun tarahan nears behas mungkus bungkusan timpung sindai karut pahangan laut nihang luhing dandang tingang, hapa ikei balaku asi belumpalangkuan awat maharing dengang bitim yuh tingan tatu bau nduan ambun andau tuh uluh tingang esum tege lunuk hakaja pating, baringen hatamuei bumbung, matuh kabaluwa belum mangun betang panjang huma hai palataran lumbah mangat bti yuh tingang humai hai palataran lumbah mangat bitim yuh tingang tatu maatur bunu randan kangereng nyaring. Dia panjang riwut raweiku tingang atu bitim ijr puna raja hai kuasam karangkan lingun ikei pantau danum kalunen. Mules ganan tandakku gandang buli masuh pamahimping langit balua tumbang lawing langit tapuk tasik ambun bara gantung langit palus masuh panjungan manjung balua tumbang kapanjungan manjung palus masuh tanjung ambun tilap telu puluh eleh tapuk ambun randah kajang pantau danum kalunen ganan tandakku buli nyelem bulau pantar tatah nyuruk rabia sadurim guntum. Sahey … sahey … sahey …

Do’a Penutup Basarah Akan Uluh Kawin

           

Nanjuriku ganan tandakku balua bulau pantar tatah nasekei labatan santin karuyangku bahanjung rabia sadurim guntum, kangkarungut ganan tandakku narinjet Ranying Hatalla Langit yuh tingang tatu etuh ikei tingang esum mahapus pumpung basarah ikei tuh mangat bitim yuh tingang tatu mujan akan ikei kayun penyang karuhei tatau sandik paturung sangkalemu raja batu sapaunggut belum liang panaling aseng tuah rajaki kapintar kaharati terutama terutama akan ewen ndue ije matuh kabalumae belum magu betang panjang huma hai palataran lumbah, tau belum halajur penyang hinje simpei paturung humba tambura, belum kabajuran kilau bunu randan kangereng nyaring. Belum tatu manyambung kilau aseng suhun danum haring raja manggigi tingkah ampah lawing baun andau, akan tanggeran lewu mandereh danum panggak rundung hapamantai tambun, mujan kea akan ikei penyang sangkalemu raja penyang panukang burung dahiang, pamalis nupi panukang pali, nangkalahan ikei bara riwut peres baratus ganggurahanan area sampar saru sasabutan bitie, bara calaka bahaya, bara kasingen lewu mandereh danum kahirin rundung hapamantai tambun ngarambang ikei kilau pulau pehun sawang hambalat tingkah ruang jumping bunge. Dia panjang riwut raweiku tingang tatu bitim je puna raja hai kuasam belum puna handung katawam karangkan lingun ikei pantai danum kalunen mules ganan tandak gandang halalian buli sambil nambawa salumpuk entang jatun atun batisa ije kurang anan balihi due eleh nambawa kuruk bar kuruk kilau nambawa manuk darung tingan nagkiau kuri bara kuri tingkah nangkiau riwut burung eleh buli hatampung kilauu bua kayun sanggalang garing mulang hatundun tingkah langajan tarung buli nyeem behas mungkus bangkusan timpung sindai karut pahangan laut akae nanteluh halawu upun tundue hariten halawu benteng haabuei kilau kahang duhung barintih tingkah baun pinggan sambung. Buli ganan tandakku nyelem rabia sadurim guntum mulang labatan santin karunyangku nyuruk rabia sadurim guntum. Sahey … sahey … sahey …

Do’a Helu Bara Kuman

Nanjuriku bahinng ganan tandakku balua bulau pantar tatah nasekei labatan labatan santin karunyangku bahanjung rabia sadurim guntum, kangkarungut ganan tandakku narinjet Ranying Hatalla Langit, yuh tingan tatu etuh ikei tingang esum jadi tingan hakampeleng renteng tambun randan hampampungan lingkat, naharep rangkan panginan simpan iran hakunyatan sukup mangat bitim yuh tingan tatu mujan akan ikei rangkan panginan simpan tuh haan nyalung kaharingan belum guhung paniting aseng batu sapaunggut ganggranan area sampar saribu sasabutan bitie, sangga tatmba, garumait, santi bahari. Tuah rajakai kapintar harati, mangat ikei hakanan rangkan pangingan simpan tuh tau akan isie daha, saluh jadi garing balemu hapa mapan tulang entang ranggang, nuntung talin jantung, nmabal atei balayu, njarumat tuwung bajahat, nimbuk isie tapas ndahang daha kurang mangat ikei tau belum nyurung isi, kilau tanjung karangan penyang, miring darh kilau laut lumbah, masuluh uhatkilau ui ranthen tingang, belum ai pajajewung benteng kilau pisang tanggan tarung, haring pajanjihau nyakatan tewu nyawung. Mangat ikei belum barigas abas, batekang tulang bara junjun helu, tiring uhat tutuk panambalun tambun. Dia panjang riwut raweiku tingan tatu handung katawan karangkan lingun ikei antai danum kalunen. Buli ganan tandakku nyelem bulau pantar tatah, mulang labatan santin karunyangku nyuruk rabia sadurin guntum. Sahey … sahey … sahey …

Do’a Helu Bara Batiruh

Inanjuriku bahing ganan tandakku, balua bulau pantar tatah, nasekei labatan santin karunyangku, bahanjung rabia sadurim guntum, palus kangkarungut ganan tandakku malawu rawei, manarinjet tingan tatuku Ranying Hatalla Langit, Jatha Balawang Bulau ; iyoiii tingang tatu Ranying Hatalla Langit, etuh aku tingan esum handak nunjung tiruh tingang, ngenjung kantuk burung, mangat bitim yoh tingan tatu : natup nyarurui bitingkuh, palus haganggulu bulau hambaruankuh manngat akau tau nupi nikpa kayun penyang karuhei tatau sandik paturung sangkalemu raja, nupi kanuah anak jatha lampang kanyambung busun hatalla hadurut, ngejau aku tingang esum bara kanarunan batiruh tau maatur kare gawi – gawingkuh bujur kabajuran kilau bunu randan kangereng nyaring, narai ije ngahandakkuh uras tau manjadi, namunan gawin junjun helu huran. Buli ganan tandakku, nyelem rabia sadurim guntum, mulang kabatan santin karunyangkuh kuruk mandabulau pantar tatah. Sahey … sahey … sahey …

Do’a Amun Handak Nampa Tanjung Jalanan

Inanjurikuh bahing ganan tandakku balua bulau pantar tatah, nasikei labatan santin karunyangkuh bahanjung rabia sadurim guntum, palus kangkarungut ganan tandakku malawu raweiku, manarinjet tingag tatuku Ranying Hatalla Langit, Jatha Balawang bulau : iyoiii tingang tatu Ranying Hatalla Langit, ambun andau etuh aku tingang esum handak manampa tanjung jalanangkuh, mangat bitim iyoh tingan tatu halajur mampahayak aku, natup nyarurui bitingkuh, nagkalahan aku bara calaka bahaya, bara bunu hantu, lau hutus, peres badi, mangat aku tingang esum sanang salamat sampai tujuankuh, bujur kabajuran jatun ati halangan sampai aku gandang halalian buli, sampai parung mahawang, buli kilau junjun helu, mulang labatan santin karunyangkuh nyuruk menda rabia sadurim guntum. Sahey … sahey …  sahey …

Disusun oleh :

OSOH T. AGAN

PARADA L.KDR, S.Ag

Diketik kembali :

Saka Palwaguna